የቤተ ክርስቲያኑ አመሰራረት ታሪካዊ አመጣጥ
በትንቢተ ሆሴዕ “ሕዝቤ ዕውቀት ከማጣቱ የተነሣ ጠፍቷል፡፡” (ሆሴዕ ፬÷ ፯ (4÷7)) እንዲሁም በግብረ ሐዋርያት ኢትዮጵያዊው ጃንደረባው “የሚመራኝ ሳይኖር ይህን እንዴት ለማወቅ ይቻለኛል?” ብሎ እንደጠየቀ (የሐዋርት ሥራ ፰÷ ፴፩ (8÷31)) ምላሽም እንዳገኘ፤ የአንድነት ኑሮው የገጠሪቱን ቤተክርስቲያን በኅብተሰቡ ቋንቋ የሚያስተምሩ የሰባክያነ ወንጌልን እጥረት ለማቃለል፤ የማሠልጠን ሥራ የጀመረው በ፲፱፻፺ ዓ.ም(1990) ክረምት ሲሆን፤ በወቅቱ በምዕራብ ሸዋ ሀገረ ስብከት ብዙ አብያተክርስቲያናት በአገልጋይ እጦት እየተዘጉ፣ ምእመናንም ጠባቂ፣ እረኛ’ መምህር በማጣት በመናፍቃን እየተነጠቁ ስለሆነ፤ የማኅበራችንን የልጅነት ድርሻ ለመወጣት ባለን ዘመናዊ ት/ቤት በክረምት ሲዘጋ ሰባክያነ ወንጌል የማሠልጠኑ ሥራ ተጀምሯል፡፡
በዚህም መሰረት የጽርሐ ጽዮን አንድነት አቡነ ተክለሃይማኖት ቤተክርስቲያን የሰባክያነ ወንጌል ማሠልጠኛ ማዕከል የመሠረት ድንጋይ በብፁዐን አባቶች ቡራኬ በተጣለበት ዕለት፤ አንድ መንፈሳዊ ማሠልጠኛ ያለ ቤተክርስቲያን የተሟላ ስለማይሆን ሠልጣኞች የተማሩትን ሥርዓተ ቤተክርስቲያን በተግባር የሚለማመዱበት፤ የአንድነት ኑሮው አባላት በዓላማቸው በተገለጸው መሠረት ስለ ዓለም ሰላም ለሀገርና ለወገን ደኅንነት የነግህና የሠርክ ጸሎት የሚያደርሱበት ቤተክርስቲያን መቋቋም እንዳለበት ነገር ግን ቤተ ክርስቲያኑ ለሰልጣኞች የተግባር መለማመጃ እንዲሆንና በዓመት የተወሰኑ ቀናት ብቻ እንዲቀደስበት ብለው በሰጡት መመሪያ መሠረት፤ ይህን መመርያ በመከተል ቤተ ክርስቲያኑ ተቋቋመ፡፡
የመሰረት ድንጋይ
በግንቦት ፳፪(22) ቀን ፲፱፻፺፮(1996) ዓ.ም ብፁዕ አቡነ እስጢፋኖስ የኢትዮጵያ ኦርቶዶክስ ተዋሕዶ ቤተ ክርስቲያን ካህናት ማሠልጠኛ መታወቂያዋ ቤተ ክርስቲያን ስለሆነች፤ ደቀ መዛሙርት የተግባር ትምህርት የሚያካሂዱበት በጻድቁ አቡነ ተክለሃይማኖት ስም ቤተ ክርስቲያን እንዲሠራ ትዕዛዝ ሰጥተው ነበር፡፡ ስለዚህ በወቅቱ የጠቅላይ ቤተ ክህነት ዋና ሥራ አስኪያጅ፣ የከንባታ ሐዲያና ጉራጌ ሀገረ ስብከት ሊቀ ጳጳስ ብፁዕ አቡነ መልከ ፄዴቅ፣ በአፍሪካ ክፍለ ዓለም የኢትዮጵያ ኦርቶዶክስ ተዋሕዶ ሊቀ ጳጳስ ብፁዕ አቡነ ጴጥሮስ፣ የወለጋ ሀገረ ስብከት ሊቀ ጳጳስ ብፁዕ አቡነ ኤልያስ በተገኙበት የቤተ ክርስቲያን የመሠረት ድንጋይ ሐምሌ ፲፩(11) ቀን ፲፱፻፺፮(1996) ዓ.ም አስቀመጡ፡፡
የመቃኞ ቤተ ክርስቲያን
በማህበሩ አባላት አስተባባሪነት በበቂ ሁኔታ የመቃኞው ቤተ ክርስቲያን ተሰርቶ በነሐሴ ፳፰(28) ቀን ፲፱፻፺፰(1998) ዓ.ም. በወቅቱ የሰሜን ሸዋ ሰላሌ ሀገረ ስብከት ብፁዕ አቡነ ቀውስጦስ፣ የደቡብ ኦሞ ሀገረ ስብከት ሊቀ ጳጳስ ብፁዕ አቡነ ዕንባቆም ባርከው ቅዳሴ ቤቱ ሆኗል።
በዕለቱም የተገኙት አባቶእ ለሠልጣኞችም የምስክር ወረቀት ሰጥተዋል፤ ከዚያ ዕለት ጀምሮ በጻድቁ በአቡነ ተክለሃይማኖት ስም ተመሥርቶ በብፁዐን አባቶች ትዕዛዝ መሰረት አዲሱ ቤተ ክርስቲያን እስኪገነባ ድረስ አገልግሎት እየሰጠ ነበር፡፡
አዲሱ ህንፃ ቤተ ክርስቲያን ከመገንባቱ በፊት የነበረው መቃኞ ገጽታ
አዲሱ ህንፃ ቤተ ክርስቲያን
በአሁኑ ወቅት የዋናው ሕንፃ ቤተክርስቲያን ግንባታ፤ በአንድነት ኑሮውና በምእመናን እንዲሁም በተለያዩ የሰንበት ትምህርት ቤት ወጣቶችና በሠልጣኞች የገንዘብ፣ የጉልበት፣ የዕውቀትና የጸሎት ድጋፍ ተጠናቆ፤ መስከረም ፯(7) ቀን ፳፻፲(2010) ዓ.ም ቅዳሴ ቤቱ ተከብሮ አገልግሎት እየሰጠ ይገኛል፡፡
