የጽርሐ ጽዮን ዘተዋሕዶ አንድነት ኑሮ ማኅበር ምሥረታ

የጽርሐ ጽዮን ዘተዋሕዶ (የሐዋርያት) የአንድነት ኑሮ ማኅበርን በእናቱ በቅድስት ድንግል ማርያምና በቅዱሳን አማላጅነት የመሠረተው፤ እንዲሁም በቡራዩ ከተማ ፄዴንያ ስመኝ ማርያም አካባቢ አሁን ማኅበሩ የሚገኝበትን ቦታ መርጦ የአንድነት ኑሮው እንዲጀመር በመንፈሳውያን አባቶች ጸሎትና ቡራኬ ወዶና ፈቅዶ የሰጠው፤ የሰውን ልጆች ድኅነት የሚሻ ጌታችንና አምላካችን መድኃኒታችን ኢየሱስ ክርስቶስ ነው፡፡

መነሻው ፤ በ፲፱፻፰ ዓ.ም ሲሆን ስለ ኢትዮጵያ ኦርቶዶክስ ቤተ ክርስቲያን ስለ ሰብከተ ወንጌል መስፋፋትና እድገት ስለአስተዳደራዊ መሻሻል ጭምር በመቆርቆር ከአዲስ አበባ ከተማ ከሚገኙ ፳፰ አድባራት በተውጣጡ ወጣቶች መንፈሳዊያን ማኅበር ተቋቁሞ የነበረው አጠቃላይ ጉባኤ ነው፡፡

ያ ዘመን ሃይማኖት የለሽ የክህደት አስተሳሰብ የሰፈነበት፤ ወጣቶች በቤተ ክርስቲያን ተገኝተው ቃለ እግዚአብሔርን መማር እንዳይችሉ የተደረገበት፤ ወቅት በመሆኑ በሀገሪቱ የማርክሲዝም የሌኒንዝም ርዕዮተ ዓለም የታወጀበት ፤ ፍልስፍናውም እግዚአብሔር አልባ በመሆኑ ታይቶ በማይታወቅ ሁኔታ በእምነት ላይ ታላቅ ተጽእኖ ተፈጥሮ የነበረበት ነው፡፡ በተለይም ወጣት ክርስቲያኖች ይህን መቋቋም ባለመቻል ከእምነታቸው እየወጡ ይታዩ ስለነበር፤ ቤተክርስቲያን ተተኪ ትውልድ እንዳታጣ በውስጥና በአፍአ ተጋድሎ መደረግ ስለነበረበት፤ አጠቃላይ ጉባኤውን ይመሩ የነበሩ አባላት፤ በጸሎት በሰጊድ በየገዳማቱ ለዘጉት አባቶች በመንፈሳዊ የጸሎት ኃይል እንዲያግዟቸው በመጠየቅ አብሮ በመቁረብ ባገኙት ዕድል ሁሉ ሌትና ቀን በመወያየት መንፈሳዊ እንቅስቃሴያቸውን ያከናውኑ ነበር፡፡

ይሁን እንጂ የልዑል እግዚአብሔር ረቂቅ ጥበብ ከሰዎች ሕሊና በላይ ልዩና ድንቅ በመሆኑ፤ በሆሣዕና ግዕዛን የሌላቸው ድንጋዮችና ሕፃናት እንዲያመሰግኑ እንዳደረገውወ ሁሉ፤ በዘመኑ በቤተክርስቲያን ጥላ ሥር የተሰባሰቡ ወጣቶች ኃይልና ሞገስ አግኝተው፤ በከሐድያን ነገሥታት ፊት ሳይፈሩና ሳያፍሩ በአደባባይ አምላክነቱን እንዲመሠክሩ ታላቅ ተዓምራቱን የገለጸበት ጊዜ ነበር፡፡

ሐዋርያው ቅዱስ ጳውሎስ ‹‹የቀረውንም ነገር ሳልቆጥር፥ ዕለት ዕለት የሚከብድብኝ፤ የአብያተ ክርስቲያናት ሁሉ አሳብ ነው ፡፡›› (፪ኛ ቆሮ. ፲፩፥፳፰) ከማለቱም በላይ ‹‹በከተማው ጣዖት መሙላቱን እየተመለከተ መንፈሱ ተበሳጨበት፡፡›› (የሐ.ሥራ ፲፯፥፲፮) ተብሎ እንደተገለጸው ሁሉ ከእኛ ቀደም የነበሩ የወሊሶው መምህር አባ ወልደ ተንሣይ ግዛው፤ በ`ላ ብፁዕ አቡነ ዲዮስቆሮስ፣ አባ ገብረ ሥላሴ ተድላ፣ ባሕታዊ ገብረ ጊዮርጊስ ትኩነህ፣ አባ ቤተ ማርያም አሽኔ፣ አለቃ ኤልያስ ነቢየ ልዑል፣ መምህር ላቀው ኤዴሳን የመሳሰሉት መንፈሳውያን አባቶቻችን፤ ምእመናን በጣዖት አምልኮ በመናፍቃን ወረራ እንዳይበከሉ፤ በንስሐ ሕይወት እንዲመላለሱ፤ የስብከተ ወንጌል አገልግሎት እንዲስፋፋ፤ የቤተ ክርስቲያን አገልግሎት እየተጠናከረ እንዲሄድ ያደረጉት ሐዋርያዊ ተጋድሎ፤ ለዚህ ማኅበር ጥንካሬ አብነት ሆኖታል፡፡

ሆኖም ሥራውን ሲሠራ በሰዎች እና በሁኔታዎች ላይ አድሮ የሚገለጹ በመሆኑ ለምስረታው እንደምክንያት የሚጠቀሱት የሚከተሉት ናቸው፡-

• ሐምሌ 21 ቀን 1966 ዓ.ም በኢ/ኦ/ተዋሕዶ ቤተ ክርስቲያን ስብከተ ወንጌልን ለማስፋፋት በቅዱስ ሲኖዶስ ሕግ ጸድቆለት በአዲስ አበባ ከተማ የሚገኙ 28 ገዳማትና አድባራት ያቋቋሙት የኢትዮጵያ ኦርቶዶክስ ተዋሕዶ ቤተክርስቲያን የወጣቶችና ጎልማሶች የስብከተወንጌል ማኅበር (አጠቃላይ ጉባኤ)፤
• ከዚህ ጉባኤ ጋር ግንኙነት የነበራቸው በየሀገረ ስብከቱ የሚገኙ የወጣቶች መንፈሳውያን ማኅበራት፤
• እንዲሁም መንፈሳውያን አባቶችና በየግላቸው በቤተ ክርስቲያን አገልግሎት ሲሳተፉ የቆዩ ምዕመናን በዋናነት የሚጠቀሱ ናቸው፡፡

አጠቃላይ ጉባኤውም በየዓመቱ በተለይም በመስቀል ዋዜማ በሚከበረው የደመራ በዓል፤ ከየአድባራቱ ካህናትና ዲያቆናት ከሚያከናውኑት መንፈሳዊ ዝግጅት በተጨማሪ፤ በአዲስ አበባና በየሀገረ ስብከቱ የሚገኙትን መንፈሳውያን ማኅበራትን በማስተባበር፤ ከአራቱም መአዘን ተነስቶ በዓሉን የተመለከቱ ልዩ ልዩ መንፈሳዊ መዝሙራት እየዘመሩ’ ትርኢቶችን እያሳዩ ወደ የመስቀል አደባባያቸው በመግባት በወቅቱ የነበረውን የክህደት ትምህርት የሚቃወሙ መንፈሳዊ ዝግጅቶች በግልጽ እያቀረቡ ሃይማኖታዊ ምሥክርነታቸውን ይሰጡ ነበር፡፡